Newid eich busnes i dariff neu gyflenwr ynni newydd
Gall newid eich cyflenwr neu gynnig arbed arian i chi ar gostau ynni busnes.
Cadarnhau p’un a ydych yn cael eich ystyried yn ‘ficrofusnes’
Os ydych yn rhedeg eich busnes gartref, efallai na fydd angen contract ynni busnes arnoch.
Os nad ydych yn siŵr a ddylech gael eich ystyried yn ficrofusnes gan gyflenwr ynni, gall Cyngor ar Bopeth helpu:
- Ffoniwch 0808 223 1133 neu defnyddiwch ei gyfleuster gwe-sgwrs.
- Ar gyfer ffôn testun, deialwch 18001 ac yna rhif y llinell gymorth.
Ein canllaw i newid cyflenwr ynni busnes
-
Cadarnhewch pa bryd y gallwch newid eich ynni busnes
Fel arfer, gallwch newid eich ynni busnes:
- os ydych ar gontract nad ydych wedi'i ddewis – fel contract ynni tybiedig neu gontract ynni diofyn. Bydd y rhain fel arfer yn gymwys os bydd gennych eiddo newydd neu os bydd contract cyfnod penodol yn dod i ben ac nad ydych wedi cofrestru ar gyfer cynnig ynni newydd eto;
- os yw eich contract ynni busnes wedi dod i ben ac nad ydych yn rhwym wrth unrhyw delerau. Efallai y bydd angen i chi roi cyfnod rhybudd mewn rhai contractau ynni busnes. Darllenwch eich telerau a siaradwch â'ch cyflenwr os nad ydych yn siŵr ynghylch y cyfnod rhybudd.
Os bydd cyflenwr yn dweud na allwch newid, rhaid iddo esbonio pam cyn gynted â phosibl. Rhaid iddo hefyd esbonio eich opsiynau os byddwch yn meddwl y dylech allu newid.
Efallai y gallwch newid i gynnig newydd o hyd os na allwch newid i gyflenwr gwahanol oherwydd eich contract. Cysylltwch â Cyngor ar Bopeth i gael help os byddwch yn cael anawsterau:
- Ffoniwch 0808 223 1133 neu defnyddiwch ei gyfleuster gwe-sgwrs.
- Ar gyfer ffôn testun, deialwch 18001 ac yna rhif y llinell gymorth.
-
Y wybodaeth sydd ei hangen arnoch i newid eich cyflenwr ynni busnes
Mae'n ddefnyddiol cael y wybodaeth ganlynol:
- Eich cod post.
- Enw eich cyflenwr presennol a'ch contract.
- Y telerau ar eich contract ynni busnes presennol: dyddiad y daw'r contract i ben ac unrhyw gyfnodau rhybudd.
- Eich costau ynni fesul uned (a ddangosir mewn oriau cilowat – kWh ar eich bil) a thaliadau sefydlog.
- Eich defnydd ynni blynyddol.
Mae gwybodaeth bwysig i'w gweld ar fil ynni diweddar. Mewngofnodwch i'ch cyfrif ar-lein os nad ydych yn cael biliau papur.
Os nad ydych yn siŵr am fanylion eich cyflenwad presennol, ewch i Canfod eich cyflenwr ynni neu weithredwr rhwydwaith.
-
Canfod contractau ynni busnes
Cysylltwch â'r cyflenwr sydd gennych eisoes i weld beth y gall ei gynnig. Dywedwch eich bod am gymharu'r hyn y mae'n ei gynnig â darparwyr eraill cyn cytuno ar gontract. Gallwch ddefnyddio gwefan gymharu neu ffonio cyflenwyr ynni gwahanol i wneud hyn.
Gallwch hefyd ddefnyddio broceriaid ynni a all drafod contract i chi am ffi. Os byddwch yn defnyddio brocer:
- gofynnwch pa gyflenwyr y mae'n eu cynrychioli er mwyn cael gwybod a all gynnig cymhariaeth o'r farchnad gyfan.
- gwnewch yn siŵr eich bod yn deall telerau ei wasanaeth. Er enghraifft, efallai ei fod yn codi ffi darganfyddwr untro neu'n integreiddio ei ffi fel rhan o gytundeb comisiwn mewn contract y byddwch yn dewis ymrwymo iddo. Gweler cyngor GOV.UK ar Osgoi telerau annheg mewn contractau busnes.
Mae bob amser yn werth gofyn i'ch cyflenwr presennol a all wneud cynnig gwell eto os byddwch yn canfod un sy'n well yn rhywle arall hefyd.
Mae hefyd yn werth gofyn i ddarparwyr anfon cynnig ysgrifenedig atoch gyda'r holl delerau cyn i chi ddweud eich bod yn cytuno ar gontract ynni busnes, gan gynnwys pan fyddwch yn trafod cynigion dros y ffôn. Mae cytundebau a wneir dros y ffôn yn gyfrwymol.
-
Pwyso a mesur eich opsiynau
Meddyliwch am bethau fel:
- Gwasanaeth cwsmeriaid cyflenwr.
- Ai'r cynnig hwn yw'r rhataf, yr un mwyaf ecogyfeillgar neu a yw'n cynnig hyblygrwydd i ddod ag ef i ben heb ffi.
- Telerau'r cyfnod rhybudd os byddwch yn dewis newid cyflenwr neu ddod â chontract i ben.
- A allwch gael arian yn ôl neu gymhellion eraill am ddim fel rhan o'ch cynnig i newid.
- A fydd yn rhaid i chi dalu unrhyw gostau ychwanegol, fel taliadau cynnal a chadw
- A yw'r contract busnes yn cynnig cyfnod ‘ailystyried’ os byddwch yn newid eich meddwl ar ôl cytuno i gontract.
- Os byddwch yn defnyddio brocer ynni, sut mae ei ffi yn gweithio gyda chontract. Er enghraifft, a yw'n dâl untro neu a gaiff ei hychwanegu at eich costau defnydd mewn contract.
-
Cadarnhau eich newid
Y cam olaf yw cadarnhau eich contract a'ch dull o dalu. Bydd talu drwy Ddebyd Uniongyrchol yn arbed arian fel arfer.
Bydd eich cyflenwr newydd yn cysylltu â chi gyda dyddiad newid. Gall gymryd hyd at 21 diwrnod i gwblhau'r broses newid. Yn y rhan fwyaf o achosion, mae'n cymryd tua 17 diwrnod.
Cyn i chi lofnodi, gwnewch yn siŵr eich bod yn deall:
- hyd y contract
- y cyfnodau rhybudd gofynnol os byddwch am newid cyflenwr neu ddod â chontract i ben
- y costau ar gyfer pob uned o nwy neu drydan a ddefnyddir fesul kWh a thaliadau sefydlog.
Os byddwch yn newid eich meddwl
Nid yw llawer o gontractau ynni busnes yn cynnig cyfnod ailystyried. Dyma'r opsiwn i ganslo contract o fewn nifer penodol o ddiwrnodau ar ôl i chi gytuno arno. Felly gwnewch yn siŵr eich bod yn fodlon ar yr holl delerau ac amodau cyn i chi gytuno ar gontract.