Pŵer glân a'ch cyflenwad ynni

Pŵer glân yw trydan a gaiff ei gynhyrchu gan ffynonellau carbon isel sy'n creu fawr ddim neu ddim allyriadau nwyon tŷ gwydr. Mae'r ffynonellau hyn yn cynnwys y canlynol:

• gwynt
• solar
• ynni niwclear
• pŵer trydan dŵr

Wrth symud i bŵer glân, bydd batris yn storio ynni adnewyddadwy i'w ddefnyddio pan fydd angen. Ond bydd angen i'r DU ddefnyddio nwy o hyd i ddarparu pŵer wrth gefn pan na fydd digon o wynt a solar. Mae hyn am nad yw ffynonellau fel gwynt a solar yn cynhyrchu ynni drwy'r amser, felly gall nwy helpu i ddarparu ynni pan na fydd digon o ynni adnewyddadwy yn cael ei gynhyrchu.

Wrth i'r DU gynyddu faint o drydan mae'n ei gynhyrchu o ffynonellau carbon isel, bydd angen i'r rhwydwaith trydan gael ei ddiweddaru hefyd. Bydd hyn yn cynnwys buddsoddi yn seilwaith ynni'r wlad.

Y cynllun yw y bydd o leiaf 95% o'r trydan y mae Cymru, Lloegr a'r Alban yn ei gynhyrchu yn dod o ffynonellau glân erbyn 2030.

Pam mae'r DU yn symud i bŵer glân

Mae sawl rheswm dros symud i bŵer glân.

Lleihau allyriadau nwyon tŷ gwydr

Mae llosgi tanwyddau ffosil i greu trydan yn cynhyrchu nwyon tŷ gwydr. Mae'r rhain yn achosi llifogydd ac yn arwain at newid hinsawdd. Gall defnyddio mwy o ffynonellau carbon isel leihau'r allyriadau hyn.

Creu system ynni fwy diogel

Mae'r DU ar hyn o bryd yn dibynnu ar fewnforio tanwyddau ffosil, fel nwy, i gynhyrchu trydan. Mae hyn yn golygu bod newidiadau mewn marchnadoedd rhyngwladol, digwyddiadau byd-eang a phrinder cyflenwadau yn effeithio ar ein system ynni. Drwy gynyddu'r defnydd o ffynonellau ynni carbon isel, gallwn wella diogeledd ynni drwy leihau ein dibyniaeth ar y tanwyddau hyn a gaiff eu mewnforio.

Sicrhau bod costau ynni yn fwy fforddiadwy dros amser

Bydd symud i bŵer glân yn gostwng costau ynni dros amser drwy ddisodli mewnforion nwy drud ac ansefydlog ag ynni adnewyddadwy rhatach a gaiff ei greu yn y DU.

Sut bydd pŵer glân yn effeithio ar eich cyflenwad ynn

Bydd symud i bŵer glân yn newid sut a ble y caiff trydan ei gynhyrchu, ond ni fydd hyn yn effeithio ar y ffordd y bydd trydan yn cyrraedd eich cartref neu fusnes. Bydd eich trydan yn parhau i ddod drwy'r rhwydwaith trydan, a byddwch yn parhau i allu dewis eich cyflenwr ynni a'ch tariff.

Bydd mwy o drydan yn dod o ffynonellau fel gwynt a solar, a bydd ffynonellau eraill fel nwy yn parhau i gael eu defnyddio pan mae ffynonellau adnewyddadwy yn isel. Bydd hefyd angen i'r rhwydwaith trydan gael ei ehangu a'i ddiweddaru i gysylltu ffynonellau newydd o systemau cynhyrchu ac i gludo trydan i'r man lle mae ei angen

Drwy ddefnyddio paneli solar gartref, gallwch helpu i leihau eich biliau ynni drwy gynhyrchu ychydig o'r trydan rydych yn ei ddefnyddio eich hun.

Beth sy'n digwydd pan nad yw'n wyntog neu'n heulog

Mae trydan yn dod o ffynonellau eraill pan mae llai o drydan o wynt neu solar. Mae'r ffynonellau hyn yn cynnwys y canlynol:

• ynni niwclear
• pŵer trydan dŵr
• gorsafoedd ynni sy'n rhedeg ar nwy
• storfeydd trydan, er enghraifft batris
• ynni biomas

Mae'r system drydan bob amser yn gytbwys fel bod y cyflenwad yn cyd-fynd â'r galw. Mae hyn yn helpu i wneud yn siŵr bod eich cartrefi a'ch busnesau'n cael trydan pan fydd ei angen arnynt.

Ein rôl yw symud i bŵer glân

Fel y rheoleiddiwr ynni, rydym yn gweithio gyda llywodraeth y DU, cwmnïau rhwydwaith, cyflenwyr ynni, cynhyrchwyr ynni a sefydliadau eraill i helpu'r DU i drosglwyddo i bŵer glân. Mae ein cyfrifoldebau'n cynnwys y canlynol:

• goruchwylio rhwydweithiau ynni
• pennu rheolau er mwyn i gwmnïau fuddsoddi mewn technoleg pŵer glân
• helpu i wella cysylltiadau ar gyfer prosiectau ynni glân newydd
• cefnogi system trydan dibynadwy a hyblyg
• gwneud yn siŵr bod cwmnïau ynni yn dilyn rheolau sy'n hyrwyddo triniaeth deg a chostau rhesymol

Darllenwch fwy am Bŵer Glân 2030 (GOV.UK) (yn agor tudalen Saesneg).

Darllenwch fwy am ein rôl wrth gyflawni sero net.