Camau i arbed ynni

Pam ei fod yn ddefnyddiol? Gall gostwng tymheredd llif eich boeler wella effeithlonrwydd eich boeler a lleihau faint o danwydd mae'n ei ddefnyddio.

Sut mae'n gweithio? Os oes gennych foeler cyfunol, gallwch reoli tymheredd y dŵr poeth a gaiff ei gyflenwi i'ch rheiddiaduron. Mae boeleri yn llosgi nwy naturiol ac yn cynhesu dŵr cyn ei anfon i'r rheiddiaduron. Fodd bynnag, mae gosodiad ‘rhagosodedig’ y boeler oddeutu 80°C fel arfer, sy'n lleihau effeithlonrwydd eich boeler. Mae gosod eich boeler ar dymheredd uwch yn debyg i yrru car ar gyflymder uchel: byddwch yn cyrraedd pen eich taith yn gynt, ond yn defnyddio mwy o danwydd. Nid yw defnyddio gosodiad tymheredd is yr un fath â gostwng y tymheredd ar eich thermostat, ac ni fydd y gostyngiad yn nhymheredd eich cartref yn amlwg. Mae'n golygu bod y boeler yn fwy effeithlon, ond y byddai'n cynhesu eich ystafelloedd yn arafach.

Beth y gallaf ei wneud? Dewch o hyd i ddeial neu osodiad y ‘tymheredd llif’ ar eich boeler cyfunol a'i addasu er mwyn gostwng y tymheredd. Gallwch ddefnyddio'r Her Arbed Arian Boeleri i weld a oes gennych foeler addas ac i ddarllen cyfarwyddiadau syml, cam wrth gam er mwyn gwneud y newid priodol.

Beth y dylwn ei ystyried? Mae'n bosibl y bydd pobl dros 65 oed, neu sydd â chyflyrau iechyd a oedd yn bodoli eisoes, am osod tymheredd llif o 60°C neu uwch er mwyn sicrhau bod eu cartrefi yn cynhesu'n ddigon cyflym.

Pam ei fod yn ddefnyddiol? Gall dŵr tap gyrraedd tymheredd uchel diangen yn aml.

Beth y gallaf ei wneud? Os oes gennych system wresogi gyda silindr dŵr poeth ar wahân, gallwch droi tymheredd y thermostat ar y silindr i lawr i 60°C er mwyn sicrhau na chaiff dŵr ei gynhesu'n ddiangen.

Beth y dylwn ei ystyried? Ni ddylai'r tymheredd ar thermostat eich silindr gael ei osod islaw 60°C, gan y gall bacteriwm legionella, sy'n gallu achosi clefyd y Llengfilwyr, oroesi a thyfu mewn dŵr a gaiff ei storio islaw'r tymheredd hwn

Pam ei fod yn ddefnyddiol? Oes oes gennych reolydd thermostat yn eich cartref, gall gostwng y tymheredd leihau faint o ynni a ddefnyddir yn gyffredinol i gynhesu eich cartref. Gallwch bennu pa reolydd sydd gennych yn eich cartref a chael rhagor o wybodaeth am fathau eraill o reolyddion gwresogi yn y ddolen isod.

Beth y gallaf ei wneud? Gostwng eich rheolydd thermostat rhwng 18 a 21°C. Dysgwch sut i newid y gosodiad ar eich thermostat.

Beth y dylwn ei ystyried? Mae Asiantaeth Diogelwch Iechyd y DU yn argymell na ddylai tymheredd dan do fod yn is na 18°C er mwyn sicrhau eich bod yn diogelu eich iechyd a'ch llesiant ac yn parhau'n gyfforddus. Fodd bynnag, mae rhai unigolion yn arbennig o agored i dymereddau oer. Mae pobl â chyflyrau cardiofasgwlaidd a chyflyrau resbiradol fel clefyd rhwystrol cronig yr ysgyfaint (COPD), babanod a phlant o dan bump oed, pobl dros 65 oed, pobl â chyflyrau iechyd meddwl neu anableddau, menywod beichiog a phobl sydd ar incwm isel yn agored i broblemau iechyd sy'n gysylltiedig â chartrefi oer, felly gwnewch yn siwr eich bod yn ddigon cynnes.

Pam y mae'n ddefnyddiol?

Gall troi'r gosodiad ar eich rheiddiadur arbed arian i chi drwy leihau faint o ddŵr poeth rydych yn ei ddefnyddio a defnyddio llai o ynni.

Sut mae'n gweithio? Mae falfiau thermostatig wedi'u ffitio ar y rhan fwyaf o reiddiaduron sy'n rheoli tymheredd ystafell drwy newid y llif dŵr poeth. Fel arfer, mae'r falfiau hyn wedi'u marcio ar raddfa o 0 i 6, lle mae sero (0) ‘wedi diffodd’ ac mae chwech (6) ‘ymlaen’ yn llawn neu ar y ‘tymheredd uchaf’ i bob pwrpas.

Beth gallaf i ei wneud? Gosodwch falfiau thermostatig eich rheiddiaduron ar y gosodiad isaf sy'n cadw'r tymheredd ar y tymheredd rydych chi'n ei ffafrio. Gwyliwch y fideo defnyddiol hwn gan yr Ymddiriedolaeth Arbed Ynni i ddysgu sut i newid thermostat eich ystafell a falfiau thermostatig eich rheiddiaduron.

Pam y mae'n ddefnyddiol? Gall gostwng y tymheredd a nifer y golchiadau eich helpu i arbed arian. Mae newid o 40°C i 30°C yn golygu y gallech gael tri chylch yn lle dau gan ddefnyddio'r un faint o ynni yn dibynnu ar eich peiriant golchi.

Sut mae'n gweithio? Gall peiriannau golchi dillad modern olchi dillad yn effeithiol ar dymheredd is.

Beth gallaf i ei wneud? Gosod eich peiriant golchi i gylch 30°C yn lle tymereddau uwch. Rhowch lwyth llawn yn y peiriant bob tro er mwyn gostwng nifer y golchiadau.

Pam y mae hyn yn ddefnyddiol? Gall defnyddio llai ar y peiriant sychu dillad olygu y byddwch yn defnyddio llai o ynni yn gyffredinol.

Sut mae'n gweithio? Peiriannau sychu dillad yw un o'r dyfeisiau sy'n defnyddio'r mwyaf o ynni yn y cartref.

Beth gallaf i ei wneud? Defnyddiwch eich peiriant sychu dillad yn llai aml drwy sicrhau bod gennych lwyth llawn neu drwy sychu eich dillad yn yr awyr agored.

Pam y mae hyn yn ddefnyddiol? Gall diffodd teclynnau eu hatal rhag draenio trydan yn dawel yn y cefndir.

Sut mae'n gweithio? Mae bron pob teclyn trydanol yn eich cartref, fel cyfrifiaduron, setiau teledu, dyfeisiau deallus a chonsolau gemau fideo, yn defnyddio pŵer yn barhaus oni chânt eu dadblygio.

Beth gallaf i ei wneud? Diffoddwch y switsh pŵer ar y soced/wal neu ddadblygio teclynnau o'r soced pan na fyddant yn cael eu defnyddio. Mae troi dyfeisiau i'r modd “arbed ynni” neu “eco” yn ffordd arall o leihau'r ynni a ddefnyddir.

Pam y mae hyn yn ddefnyddiol? Gall cau llenni/bleinds olygu bod llai o aer cynnes yn dianc drwy'r ffenestri dros nos. Gall gwneud hynny leihau eich costau gwresogi.

Sut mae'n gweithio? Gall llenni neu fleinds helpu i atal aer cynnes rhag dianc drwy'r ffenestri. Os yw eich rheiddiadur o dan y ffenestr, gall cau'r llenni helpu i gadw aer cynnes (o'r rheiddiadur) y tu mewn am gyfnod hwy gan leihau costau gwresogi.

Beth gallaf i ei wneud? Cofiwch gau'r llenni/bleinds dros nos.

Pam y mae hyn yn ddefnyddiol? Gall newid i fylbiau golau ynni effeithlon leihau costau ynni heb effeithio ar y golau y byddwch yn ei ddefnyddio yn eich cartref.

Sut mae'n gweithio? Nid yw faint o olau, na lliw y golau (gwyn neu felyn) y mae bylb golau yn ei roi yn gysylltiedig â'r ynni a ddefnyddir ganddo. Felly, gallwch gael union yr un lliw neu faint o olau yn eich ystafell am gost ynni is o lawer.

Beth y dylwn ei wneud? Dysgwch pa fath o fylbiau sydd gennych ar hyn o bryd a sut i uwchraddio.

Pam y mae hyn yn ddefnyddiol? Atal drafftiau yw un o'r camau rhataf a mwyaf effeithiol y gallwch eu cymryd i atal gwres rhag dianc a lleihau eich biliau ynni.

Sut mae'n gweithio? Gall flocio bylchau digroeso o amgylch ffenestri, drysau a'r llawr sy'n gadael yr aer oer i mewn a'r aer cynnes allan. Fel hyn, byddwch yn defnyddio llai o ynni i wresogi eich cartref.

Beth gallaf i ei wneud? Ewch i dudalen we yr Ymddiriedolaeth Arbed Ynni i gael cyngor ar sut i atal drafftiau yn eich eiddo.

Pam y mae hyn yn ddefnyddiol? Os mai gwydro sengl sydd gennych ar eich ffenestri, gall ychwanegu haen eilaidd (deunyddiau tryloyw fel ffilm blastig) olygu bod llai o wres yn dianc drwy'r ffenestri.

Sut mae'n gweithio? Mae'r mesur hwn yn efelychu effaith cael gwydro eilaidd.

Beth gallaf i ei wneud? Ewch i'r Ganolfan Ynni Cynaliadwy i gael arweiniad ar sut i ychwanegu gwydro eilaidd.

Beth y dylwn ei ystyried?Mae'n bwysig sicrhau bod awyru da ym mhob ystafell o hyd. I gydbwyso ansawdd yr aer ac ynni, gallech orchuddio ffenestri na ellir eu hagor neu orchuddio cwareli ffenestri, a fyddai'n golygu y byddech yn dal i allu agor y ffenestri.

Pam y mae hyn yn ddefnyddiol? Os oes gennych danc dŵr poeth, a elwir yn silindr dŵr poeth weithiau, gall inswleiddio wella pa mor effeithlon ydyw a'i wneud yn rhatach i'w ddefnyddio.

Sut mae'n gweithio? Mae'r inswleiddiad yn golygu bod llai o wres yn cael ei golli. Mae gosod inswleiddiad ar y tanc dŵr poeth fel rhoi siaced aeaf amdano. Mae'n cadw dŵr yn boeth am gyfnodau hwy ac mae'n lleihau faint o ynni a ddefnyddir i'w wresogi. Dyna pam y gelwir yr inswleiddiad ar gyfer tanciau dŵr poeth yn aml yn “siaced silindr”.

Beth gallaf i ei wneud? Dylech edrych i weld a oes gennych danc dŵr poeth drwy ddefnyddio'r Her Arbed Arian Boeleri. Os oes gennych danc dŵr poeth, dylech ystyried buddsoddi mewn siaced silindr dŵr poeth, sydd ar gael yn y rhan fwyaf o siopau nwyddau metel ac ar-lein. Dylech ddilyn cyfarwyddiadau'r gweithgynhyrchydd wrth osod y siaced.

Pam y mae hyn yn ddefnyddiol? Mae thermostatau a rheolyddion gwres deallus yn rhoi mwy o hyblygrwydd a rheolaeth i chi dros eich defnydd o ynni.

Sut mae'n gweithio? Mae'n eich galluogi i drefnu bod eich gwres a'ch dŵr poeth yn dod ymlaen pan fydd ei angen yn unig lle bydd rheolyddion safonol yn aml yn golygu bod angen i chi eu haddasu â llaw (fel falfiau thermostatig rheiddiaduron). Gall rhai thermostatau deallus addasu'r defnydd o ynni yn dibynnu ar y tywydd.

Beth gallaf i ei wneud? Ewch i dudalen we yr Ymddiriedolaeth Arbed Ynni i gael canllawiau ar reolyddion gwresogi deallus.

Pam y mae'n ddefnyddiol? Mae mesurydd deallus yn golygu y gallwch weld yn union faint o ynni rydych yn ei ddefnyddio, ac mae'n rhoi mwy o reolaeth i chi dros eich defnydd o ynni.

Sut mae'n gweithio? Mae mesuryddion deallus yn olrhain eich defnydd o ynni fel y gallwch weld yn union faint rydych yn ei wario ar ynni, gan eich helpu i leihau eich defnydd. Os oes gennych fesurydd deallus gallwch hefyd gofrestru i gael tariffau arbennig a all arbed arian i chi ar bethau fel cerbydau trydan.

Beth gallaf i ei wneud? Cysylltwch â'ch cyflenwr ynni, a fydd yn trefnu bod mesurydd yn cael ei osod am ddim. Gallwch fynd i Smart Energy GB i gael rhagor o wybodaeth.