Ein bwrdd a'n cyfarwyddwyr

Cafodd Barry Panayi ei benodi'n aelod o'n bwrdd ym mis Mawrth 2020 am bum mlynedd. Cafodd y cyfnod hwn ei estyn am ddwy flynedd arall yn 2025. Ar hyn o bryd, ef yw Prif Swyddog Data a Gwybodaeth John Lewis.

Mae'n arbenigo mewn data a thrawsnewid digidol. Mae Barry wedi arwain timau data, gwybodaeth a digidol mewn sefydliadau fel Ernst & Young, Bupa, Virgin a Lloyds Banking Group.

Mae Barry yn hyrwyddo pŵer data ac mae wedi gweithio ar nifer o fentrau yn y sector preifat a'r sector cyhoeddus yn ogystal â hyrwyddo pwysigrwydd sgiliau digidol yn ein cymdeithas.

Cafodd Graham Mather ei benodi'n aelod o'n bwrdd ym mis Tachwedd 2023 am bum mlynedd. Ef yw llywydd y Fforwm Seilwaith ar hyn o bryd.

Mae gan Graham brofiad ym meysydd cystadleuaeth, rheoleiddio, y gyfraith ac economeg. Cyn hynny, roedd yn un o gyfarwyddwyr anweithredol Ofcom a'r Swyddfa Rheilffyrdd a Ffyrdd, a hefyd yn aelod o'r Comisiwn Monopolïau a Chyfuniadau a'r Tribiwnlys Apeliadau Cystadleuaeth.

Yn 2017, cafodd ei benodi'n Gadlywydd Urdd yr Ymerodraeth Brydeinig am wasanaethau ym maes rheoleiddio economaidd, cystadleuaeth a datblygu seilwaith.

Cafodd Jonathan Kini ei benodi'n aelod o'n bwrdd ym mis Tachwedd 2023 am bum mlynedd. Ar hyn o bryd, mae'n un o gyfarwyddwyr anweithredol Ofwat. Ef hefyd yw Prif Swyddog Gweithredol egin fusnes telathrebu sy'n profi technoleg band eang newydd.

Cyn hynny, gweithiodd Jonathan fel Cyfarwyddwr i Virgin Media a Vodafone, fel Rheolwr Gyfarwyddwr Is-adran Defnyddwyr a Menter TalkTalk, ac yn Drax Plc fel Prif Swyddog Gweithredol ei fusnesau manwerthu. Mae wedi gweithio mewn rolau cynghori ym Manc Lloegr ac ar hyn o bryd, mae'n gynghorydd yn Rebalance Earth.

Cafodd Nick Winser ei benodi'n aelod o'n bwrdd ym mis Ebrill 2025. Ef yw Comisiynydd Rhwydweithiau Trydan cyntaf y DU, gan gynnig argymhellion annibynnol er mwyn cyflymu'r broses o roi seilwaith trawsyrru trydan ar waith.

Mae'n Gomisiynydd Pŵer Glân 2030, Uwch-gyfarwyddwr Annibynnol yn Greencoat UK Wind, ac mae'n gyn gadeirydd Energy Systems Catapult, gan wasanaethu ar eu bwrdd am dros 9 mlynedd.

Gyda mwy na 30 mlynedd o brofiad ym maes rhwydweithiau trydan, mae Nick wedi bod yn allweddol wrth gynghori'r llywodraeth a'r diwydiant ar bolisi ynni.

Cafodd Tony Curzon Price ei benodi'n aelod o'n bwrdd ym mis Tachwedd 2023 am bum mlynedd. Ar hyn o bryd, mae'n gydymaith polisi yn Nesta ac Ysgol Economeg a Gwyddorau Gwleidyddol Llundain.

Mae Tony yn economydd sy'n ymddiddori mewn technoleg, ynni, yr amgylchedd, a rheoleiddio economaidd, ac mae wedi bod yn ymwneud â pholisi ynni a'r amgylchedd y DU ers dros 30 mlynedd. Fel entrepreneur ym maes technoleg a'r cyfryngau, treuliodd Tony bedair blynedd yn Silicon Valley.

Cyn hynny, bu'n gynghorydd yn yr Adran Busnes, Ynni a Strategaeth Ddiwydiannol, Swyddfa'r Cabinet, Rhif 10, yr Awdurdod Cystadleuaeth a Marchnadoedd a'r Awdurdod Ymddygiad Ariannol.

Cafodd Warren Buckley ei benodi'n aelod o'n bwrdd ym mis Tachwedd 2023 am bum mlynedd. Ar hyn o bryd, ef yw Cadeirydd ein Pwyllgor Pobl a Chydnabyddiaeth ac mae hefyd yn aelod o fwrdd Gwasanaeth yr Ombwdsmon Ariannol.

Cyn hynny, ef oedd Cadeirydd Cymdeithas Genedlaethol Cyngor ar Bopeth, ar ôl gwasanaethu ar ei bwrdd am dros 10 mlynedd, a bu hefyd yn Gadeirydd y Fforwm Anabledd Busnes.

Dros y 30 mlynedd diwethaf, mae Warren wedi gweithio mewn rolau arwain gwasanaeth cwsmeriaid yn y sector corfforaethol a'r sector elusennau. Mae hyn yn cynnwys arwain timau darparu gwasanaethau a manwerthu mawr mewn cwmnïau fel Vodafone, Orange, BT, Openreach, HSBC a Thames Water.

Ymunodd Neil Kenward ag Ofgem ym mis Ebrill 2020. Ar hyn o bryd, ef yw'r Cyfarwyddwr Gweithredol ar gyfer Strategaeth, Economeg, Ymchwil a Sero Net. Mae ei gyfarwyddiaeth yn nodi ein blaenoriaethau strategol, yn darparu dadansoddiad a gwybodaeth i lywio penderfyniadau am y rhain, ac yn gweithio gyda'r Llywodraeth i'w cyflawni.

Cyn ymuno ag Ofgem, bu Neil yn Bennaeth Polisi Ynni a'r Amgylchedd a Gwariant yn Nhrysorlys EF am bum mlynedd. Mae wedi gweithio mewn amrywiaeth o rolau ym maes ynni, economeg a strategaeth yn Llywodraeth y DU a'r sector preifat gan gynnwys gweithio yn Uned Strategaeth Tony Blair a rhedeg rhwydwaith economeg y Swyddfa Dramor.

Ymunodd Neil Lawrence ag Ofgem ym mis Gorffennaf 2021. Ef yw'r Cyfarwyddwr Cyflawni a Chynlluniau presennol. Mae ei gyfarwyddiaeth yn gweinyddu 12 o gynlluniau ynni carbon isel a chymdeithasol sydd â gwerth blynyddol o £12 biliwn, gan gyflawni uchelgeisiau'r Llywodraeth o ran mynd i'r afael â thlodi tanwydd a hyrwyddo datgarboneiddio.

Cyn ymuno ag Ofgem, treuliodd Neil naw mlynedd yn Deloitte yn darparu gwasanaethau proffesiynol i gleientiaid yn y sector ynni ac adnoddau. Dechreuodd ei yrfa yn y sector ynni yn gweithio i gwmnïau ynni integredig.

Ymunodd Priya Brahmbhatt-Patel ag Ofgem ym mis Ionawr 2021 fel Cyfarwyddwr Gweithredol Cyfathrebu ac Ymgysylltu. Mae ei chyfarwyddiaeth yn cwmpasu holl feysydd materion corfforaethol, gan gynnwys cyfathrebu strategol, cyswllt â'r cyfryngau a materion cyhoeddus, ymgysylltu â rhanddeiliaid, a'r wefan a'i sianeli digidol.

Cyn ymuno ag Ofgem, bu'n Gyfarwyddwr ac yn Ddirprwy Gyfarwyddwr yn y Weinyddiaeth Tai, Cymunedau a Llywodraeth Leol, yr Adran dros Ddiwylliant, y Cyfryngau a Chwaraeon a'r Adran Busnes, Ynni a Strategaeth Ddiwydiannol. Mae ganddi dros 20 mlynedd o brofiad ym maes cyfathrebu ar draws llywodraeth, rheoleiddio a gwleidyddiaeth.

Ymunodd Sinead Murray ag Ofgem yn 2021 fel Cwnsler Cyffredinol. Ei blaenoriaethau yw sicrhau bod gwasanaethau cyfreithiol a llywodraethu yn cael eu rhedeg mewn ffordd sy'n ein helpu i gyflawni ein hamcanion, gan ddiogelu buddiannau defnyddwyr a helpu i gyflawni sero net ar yr un pryd. Mae hefyd yn noddi rhwydwaith EnAble Ofgem ar y cyd.

Cyn hynny, bu'n Gyfarwyddwr yn Adran Gyfreithiol y Llywodraeth, yn Gyfarwyddwr Cyfreithiol yn yr Adran Busnes, Ynni a Strategaeth Ddiwydiannol, ac yn Gyfarwyddwr Treth Bersonol a Gwasanaethau Corfforaethol yn CThEF.

Yn ystod ei gyrfa gynnar, arweiniodd brosiectau fel y cais i gynnal y Gemau Olympaidd, sefydlu Asiantaeth Ffiniau’r DU a chynghori ar faterion troseddol rhyngwladol.

Ymunodd Tim Jarvis ag Ofgem ym mis Medi 2023. Ef yw'r Cyfarwyddwr Cyffredinol ar gyfer Marchnadoedd ar hyn o bryd. Mae ei Grŵp yn gweithio i sicrhau prisiau teg a safonau gwasanaeth cwsmeriaid uchel, gan wella cydnerthedd ariannol a'r gallu i fuddsoddi ar draws y sector manwerthu ar yr un pryd. Rydym yn defnyddio ein pwerau monitro a gorfodi i wella ymddygiad, perfformiad, a chanlyniadau.

Cyn ymuno ag Ofgem, roedd yn un o gyfarwyddwyr Trysorlys EF. Cyn hynny, gweithiodd i'r Adran Busnes, Ynni a Strategaeth Ddiwydiannol a'r Awdurdod Cystadleuaeth a Marchnadoedd.

Mae ganddo fwy na 25 mlynedd o brofiad o weithio ym maes polisi cyhoeddus a rheoleiddio, gan arwain ymchwiliadau i farchnadoedd, adolygiadau rheoli prisiau, ac ymholiadau uno.